Երևանում ընթանում է 28-րդ միջազգային PX տեղեկատու խմբի հանդիպումը

Ամբողջ աշխարհում արմատական նշանակություն ունեն էլեկտրոնային տվյալների բազաները, որոնք հեշտացնում են վիճակագրական տվյալների օգտագործումը: Այդ նպատակով ԱՄՆ ՄԶԳ աջակցությամբ Առողջապահության Ազգային Ինստիտուտը ներդրել է PX գործիքների և ծրագրերի միջոցով մշակված էլեկտրոնային տվյալների բազա:

Առողջապահության նախարարությունը մշտապես օգտագործում է էլեկտրոնային տվյալների բազայի ցուցանիշները հանրային առողջապահական քաղաքականության մշակման գործընթացում: Այն օգտակար է ոչ միայն քաղաքականություն մշակողների, այլ նաև առողջապահության ոլորտի մասնագետների, հետազոտողների և այլոց համար։

Նոյեմբերի 12-ին Երևանում բացվել է միջազգային PX տեղեկատու խմբի 28-րդ երկօրյա հանդիպումը, որին մասնակցում է 40 մասնագետ 12 երկրից: Գիտաժողովի նպատակն է համախմբել ոլորտի ներկայացուցիչներին, ովքեր կկիսվեն PX-ընտանիքի տարբեր գործիքների և ծրագրերի գիտելիքներով, իրենց փորձով և ապագա պլաններով:

PX-ը վեբ-հարթակ է, որը էլեկտրոնային տվյալների բազաներից տեղեկատվություն քաղելու հնարավորություն է ընձեռում ՝ ըստ պահանջվող պարամետրերի։ Քաղված տվյալները PX-ը կարող է արտահայտել աղյուսակների կամ գրաֆիկների տեսքով։

Ինչպես պարզաբանեց Ասա Արհենը Շվեդիայի, վիճակագրական վարչությունից, PX -հավելվածը մշակել է Շվեդիայի վիճվարչությունը՝ Հյուսիսային Եվրոպայի երկրների հետ համագործակցությամբ։

Հայաստանում այս հանդիպման կազմակերպիչը ՀՀ ԱՆ Առողջապահության ազգային ինստիտուտն է, որը հաջողությամբ կիրառում է PX գործիքը՝ առողջապահական վիճակագրական տվյալների հետ աշխատելիս։ Ինստիտուտի կայքում զետեղված գործիքի օգնությամբ http://109.75.36.126/PXWeb/pxweb/hy/, տվյալների երկու բազաներից՝ Առողջապահական ֆինանսական ցուցանիշներ և Առողջապահական ցուցանիշներ, կարելի է ժամանակային կամ տարիքային, սեռային, ոլորտային, նոզոլոգիական և այլ կտրվածքներով կատարել տվյալների ընտրություն՝ հետագա վերլուծության համար։ Այսօր հանրային առողջապահության պատասխանատուները ոլորտի հետ կապված որոշումներն ընդունում են հենց այդ վերլուծությունների հիման վրա։