ՀՀ ԱՆ ակադեմիկոս Ս.Ավդալբեկյանի անվան Առողջապահության ազգային ինստիտուտի և «ARKONA» ֆիրմայի հրավերով Հայաստանում էր «Ապոլոնիա» կլինիկա-ստուդիայի բժիշկ, УАЭС անդամ, DentsplySirona ընկերության օպինիոն-ղեկավար, Սերգեյ Ռադինսկու կենսամիմետիկ մեթոդի կիրառմամբ

ՀՀ ԱՆ ակադեմիկոս Ս.Ավդալբեկյանի անվան Առողջապահության ազգային ինստիտուտի և «ARKONA» ֆիրմայի հրավերով Հայաստանում էր «Ապոլոնիա» կլինիկա-ստուդիայի բժիշկ, УАЭС անդամ, DentsplySirona ընկերության օպինիոն-ղեկավար, Սերգեյ Ռադինսկու կենսամիմետիկ մեթոդի կիրառմամբ ատամների վերականգնման բազային կուրսի, «Ապոլոնիա» ուսումնական կենտրոնի դասախոս Քսենյա Լազարևան: Հրավերի նպատակն էր Հայաստանի բոլոր մարզերի ստոմատոլոգների համար կազմակերպել գիտագործնական սեմինար:
Քսենյա Լազարևան դասախոսությամբ հանդես եկավ «Elite Plaza» բիզնես-կենտրոնում, «Ատամների վերականգնման պարզ որոշումներ» թեմայով:
Բացման խոսքով հանդես եկան Առողջապահության ազգային ինստիտուտի Ընտանեկան ստոմատոլոգիայի դասընթացների գիտագործնական կենտրոնի ղեկավար, բ.գ.թ., դոցենտ Լուսինե Մուրադյանը և «ARKONA» ֆիրմայի տնօրեն Լևոն Խառատյանը: Լ.Մուրադյանը, ողջունելով մասնակիցներին, հատկապես, անդրադարձավ այն փաստին, որ Առողջապահության ազգային ինստիտուտն իր ավելի քան կեսդարյա գործունեության ընթացքում, հանդիսանալով բժիշկների կատարելագործման և վերապատրաստման դարբնոց, այսօր ևս շարունակում է իր հայրենանվեր առաքելությունը՝ շարունակաբար աշխատանքային ուղեգիր տալով հազարավոր բժիշկների, այդ թվում ստոմատոլոգների: Լ. Մուրադյանը շեշտեց, որ դասախոսությունն արդիական է, մեր ժամանակների պահանջներին համահունչ: 
Դասախոսությունն ուղեկցվեց խիստ ինֆորմատիվ սլայդների տեսացուցադրությամբ, որոնք նպաստեցին ներկայացվող թեմայի առավել արդյունավետ յուրացմանը: Գիտագործնական դասախոսությանը ներկա էին Հայաստանի բոլոր մարզերից ժամանած բժիշկ-ստոմատոլոգներ, նրանց համար փորձառու մասնագետն անցկացրեց նաև ֆանտոմների հետ կատարվող վարպետության դասեր, որոնք ավելի էին շեշտադրում դասախոսության թեման:
Դասախոսությունը և վարպետության դասերը հնարավորություն ընձեռեցին մեր բժիշկներին ևս մեկ մակարդակով բարձրացնել իրենց մասնագիտական արհեստավարժությունը, հարստացնել գիտելիքները՝ դրանք գործնական աշխատանքում կիրառելու նպատակով:
Նշենք, որ գիտագործնական սեմինարից հետո բոլոր մասնակիցները կստանան համապատասխան ՇՄԶ կրեդիտներ: